泊車被困90度窄位 車主自製有趣教學

成件事令人諗起電影《車手》入面余文樂「八千轉,兩米車」。

 

話說車主Calvin放假時泊街位,返到嚟發現隔離線泊滿哂車,

剩低一個90度窄位,

畀著你,你有冇信心入後波出到彎?

 

Calvin唔單止充滿信心,仲拍埋片,

加上電影《車手》片段做剪接,

仲配埋90年代經典飛車西片《The Rock》嘅飛車場面音樂,

教大家遇上呢啲情況,

可以點樣安全同順利出返彎。

佢上載咗段片去「馬路的事討論區」,

隨時引嚟好多討論,

唔少網民都大讚段片搞笑,

而且亦從Calvin嘅教學圖學到嘢!

 

事後Calvin喺個人FB話,

整呢段片係想娛樂吓大家,純粹搞笑,

冇諗過最後會畀傳媒報道。

「我常說首先要讓自己快樂起來,同你生活的人或朋友,

先有能力一起共享開心健康幸福的日子。」

 

的確,依家好多講駕駛者嘅group都係鬧來鬧去,

難得Calvin唔係從鬧人亂泊車阻街嘅角度出發,

而係想整條片大家笑吓,

真係好值得讚!

 

「係現今社會咁多紛紛擾擾的時候,

如果香港地只得呢類開心搞笑材料可報導,

國泰民安,你話幾好呢。」

 

Posted by Calvin Chan on 2017年11月11日