大掃除，其中一part係清雪櫃。
執執下會見到啲過期n年、不過未開過嘅食物。
雖則有說法話，食用期限只係參考，
但係心理上點都有陰影。
英國《每日郵報》報導，當地每年棄置嘅過期食物當中，
有440萬噸係唔駛送去堆填區，
足以令一個家庭每年慳返700英鎊（約港幣$7600)。
該報就搵專家測試，檢查過期食物嘅含菌量，睇吓究竟食得唔食得。
佢地搵咗罐頭豆、醬汁、梳打粉等超市包裝食品，
起碼過期一年半載，最勁係有盒辣椒粉，
2000年到期！
結果發現，除咗一支聞都聞到臭嘅過期15年啤酒之外，
其餘一概ok。
專家仲話，「最佳食用日期」(Best Before)係指享用產品質素最佳期限，
而唔係過咗呢日就會滋生細菌。
如果唔想浪費過期嘅包裝食品，專家就話食之前睇睇包裝有冇破損，
打開之後只要聞吓試吓，冇變成怪味嘅都仲可以一戰。
咁阿媽就有藉口唔掉嗰罐擺咗10年都唔捨得食嘅罐頭鮑嘞。