使用條款 | 私隱政策

極難忘 求婚戒指跌落坑渠 準新人失而復得

而家啲人求婚越整越大壇,又直升機又盛。

我真係恭喜你呀~~~

 

其實,夠難忘又唔一定要大堆頭,不過好似呢單咁……

又真係太難忘太驚喜。

 

紐約警方近日就追尋緊一對男女嘅下落,

佢地唔係犯咗事,反而係出咗事……

 

事緣紐約警方喺推特出咗條片,

片中男子喺美國紐約時代廣場附近街頭,

不顧身世趴喺地,似乎搵緊嘢。

根據內文,原來係跌咗隻求婚戒指,

穿過地面金屬網,直墮2.5米深嘅地下管道。

 

事後,呢對情侶向警方求助,但係冇留低聯絡方法就離開現場。

好在警察喺管道入面搵得返隻戒指,於是就用呢條片,

希望搵返當事人。

經過萬幾次瘋傳之後,終於搵到呢對來自英國、拍拖十年嘅情侶John同Daniella。

出事之後冇耐,呢一pair準夫妻就返咗英國,仲好快手咁買返隻戒指。

 

好多人以為係John求婚時搵錯地方,好揀唔揀揀個有鐵絲網嘅地方,

仲要一時失手,先搞到咁lea hea。查實故事並唔係咁。

 

Daniella話,當日稍早John喺紐約中央公園求婚,

佢就梗係say yes仲戴住隻戒指啦。

點知夜晚行到事發地點,戒指一鬆就咁跌咗。

當刻,John即刻搵警察幫忙,但Daniella覺得一定搵唔返,喊咗出嚟。

不過有唔少途人幫手搵,仲有個唐氏綜合症嘅女仔,同Daniella抱抱安慰佢。

畢竟唔係咩開心事,所以佢地冇同親友講起,

直到有朋友send條片嚟,先知道隻戒指搵得返。

 

John表示,會將事後新買嘅戒指退回,

並且將款項用嚟請有份幫手嘅警員飲返杯。

佢地暫定2020年行禮,希望到時一切順利啦!

原文傳送門

【相關搜尋】求婚鑽戒騙局