讀得大專，怕且都起碼十七八歲啦。
估唔到去到呢個年代，呢個年紀，仲有學校當談戀愛係大忌。
明愛專上學院及明愛白英奇專業學校聯合學生會就喺facebook出post，
指佢地一個叫「明愛邱比特」嘅活動，
因為不獲學生事務處審批內容而未能舉行。
「明愛邱比特」係做咩嘅呢？根據活動宣傳品介紹，
係一個幫同學做匿名配對，如果成功的話就俾參加者同「有緣人」影合照。
呢份聲明講出活動被ban原因，包括:
- 活動名稱「明愛邱比特」的「邱比特」三字有鼓吹同學談戀愛的意思。
- 當中的活動「匿名配對」只讓同學與一人配對，配對活動有鼓吹同學談戀愛的意思。
- 活動「定情信物」因包含在「明愛邱比特」系列活動中，所以亦未能通過。
而且，學生會亦提到，校方唔想鼓吹同學談戀愛，並認為若果活動被校外教友得悉，
會向學校投訴，影響學校聲譽。
學生會曾修改活動內容同名稱，務求過關，結果都不得要領。
佢地為此各同學道歉，亦希望爭取日後再次舉辦同類活動。
唔少網友都笑校方保守，仲話學校係「明愛專上小學」。
即使係學校最擔心會投訴嘅「校外教友」，都不滿校方做法。
當Netflix新劇Sex Education講緊高中生各式性生活疑難時，
香港嘅大專就禁止一個莫講話性、甚至只係戀愛前期部份（都談唔上）嘅活動。
影響學校聲譽？咁保守嘅作風，就真係幾影響聲譽嘅。