使用條款 | 私隱政策

又係阿嫂出手清場?垃圾站發現佐敦波鞋

 

男人只係一個上咗年紀嘅男童,鍾意玩具嘅心態根本一樣,

分別只係有個錢喺手,鍾意玩嘅唔止係模型、打機,

可以係波鞋、錶、車、科技嘢、運動裝備……

 

於是乎間唔中都會見到呢類post︰

女士趁身邊人出埠,偷偷地出post賣咗佢地嘅珍藏!

今日就有網友喺大埔一個垃圾站附近,

見到好幾對新簇簇嘅佐敦波鞋被棄置!

出post嘅巴打好抵死咁話︰

係咪又有人趁個老公唔係屋企,掉晒老公啲寶貝出街?

 

有眼利網友就見到,鞋底黃黃地嗰對,係2016年Space Jam版本,

市價可能有成三四千蚊!

大家都好心急,想去救返批鞋,

尤其是呢期好興忽然灑陣雨,就真係喊都無謂。

就算唔係自用,都起碼幫物主留起。

之後有網友報料,呢批鞋已經消失咗嘞……

 

又唔好怪晒「阿嫂」,有人估計可能係家人清理遺物都唔定。

之所以「阿嫂」成為頭號嫌疑犯,唔多唔少同呢單有關。

早幾日有位絲打喺玩具買賣專頁出貨,

話老公呢期好迷《復仇者聯盟》,買咗唔少玩具,佢覺得好幼稚,

於是想偷偷賣走晒,價錢只係1000蚊。

我話「只係」1000蚊,因為有師兄估計批貨值30000蚊!

 

各位有儲嘢嘅兄弟,都係夾份租個倉啦。

最近的19+幾樣野