使用條款 | 私隱政策

扮有錢人 晒百萬現金照片 淘寶4蚊人仔有交易

 

淘寶乜都有,之前介紹過嘅「真人代吃」服務,

即俾錢搵人幫你飲飲食食,買家可以得到食評同呃like相,

話係滿足要減肥但又為食嘅用家喎。

 

百貨中百客,今次就介紹另一種服務︰代你晒命!

 

社交媒體當道之後,有個錢嘅都冇以前啲人咁低調,

借啲意post吓去邊玩去邊食。

個個都想晒命,唔通個個都有得晒咩?

有圖都冇真相,以前都仲可以靠小把戲扮吓出國揸靚車,

而家?有片先得呀,想逼死誰!

 

於是有人喺淘寶提供拍攝名車內籠片段,一條只係6蚊人仔。

配埋自己把聲入去都得!

幫手打埋卡留地點位置?一樣做到冇難度。

想晒自己有100萬人仔現金?俾4蚊買相就得,

「槓杆比率」係25萬倍!!

仲有包裝自己成為有生活品味又有文青氣質嘅相片素材,8蚊;

教你點樣喺朋友圈提升形象嘅教材,11蚊。

 

好多網紅會影喺酒店落地玻璃歎世界,

於是內地出現咗「網紅咖啡店」,聲稱唔駛去香港都影到「網紅酒店風」,

五十蚊人仔就可以喺場地提供嘅大床、著起浴袍、包埋頭巾,

扮成剛剛出浴嘅貴婦,咁咪有相用嚟出post呃like囉!

到最後真係有錢嗰位,就係做「代你呃like」嘅店家嘞。

而想做好門面工夫嘅,就繼續俾錢人駛啦,鬼叫你洗濕個頭咩。

原文傳送門

最近的19+幾樣野

唔想分心玩電話? 用定時解鎖食物盒鎖起手機

「當值時我會想著你」 二手店發現 65年前士兵的道歉情書

《芝麻街》新角色 教小朋友認識「寄養家庭」

group chat公然爆粗鬧 內衣店新同事被欺凌 係咪羅生門?

現實版《小飛象》受盡折磨 瘦骨嶙峋斷腳慘死

法官審案金句多 網友︰呢啲官先至夠貼地