使用條款 | 私隱政策

《忘記和記》效應 你忘記唔到嘅和記x黎明廣告(下)

 

今日繼續回帶,睇返當年嘅和記Leon廣告!

 

第七代-全!智!賢!

主題歌︰《如果可以再見你》

金句︰Just to say Hi

故事︰繼續靚人靚景但故事平平,Leon去天山天池旅行遇上一齊有鋪癮大叫嘅靚女。分道揚鑣之後,Leon拎部電話打俾伊人,好瀟灑咁講句Just to say Hi。

 

當年有份拍Leon廣告嘅阿May,就好似占士邦嘅邦女郎咁,一定大肆宣傳。當時只知呢一代女主角係韓國美女,幾年後有套韓片上畫,喺韓流方興未艾之際收到幾千萬票房!嗰時先知,《我的野蠻女友》嘅女神全智賢,原來就係當年嘅阿May!

 

當時另一個最多人討論嘅話題係……Just to say Hi呢句英文啱唔啱文法。

 

第八代-Su Su Sugar in the Marmalade

主題歌︰《Sugar in the Marmalade》/《從今開始》

金句︰Can I have your number?

故事︰同Lee Ann嗰代都係將故事一分為二,快歌打頭陣配合沙灘熱辣辣場景,潮玩水上電單車嘅Leon邂逅混血阿May,「summer完咗我就要走啦」,於是阿May帶Leon去咗個好荒僻嘅沙灘……結局就梗係happy ending啦。

今次嘅亮點我覺得係第二條片一開頭Leon半裸笠返件背心,難得一見呀。但係而家睇返,我都係記得張家輝惡搞個版本多啲……

第九/十代-348 feel

主題歌︰《眼睛想旅行》、《聽身體唱歌》

金句︰冇

故事︰呢2條廣告唔知算唔算「阿May系列」,可能當時Budget比較緊啦,都係普普通通有Leon再搭個靚女拍個廣告就算。不過《聽身體唱歌》入面嘅阿May係歷代身材最火辣。

 

第十一代-分離篇

主題歌︰《一言為定》

金句︰說話唔係隨便講,講過嘅我一定做到

故事︰機場外面,Leon同情人淋雨,疑似阿May決定入閘起飛之際,收到Leon視像通話,見到一對戒指閃呀閃。

因為大推3G服務,所以Leon廣告又出現了。計落呢個係初代阿May廣告推出10周年,當年嘅豬妹嗰陣都大個喇,難怪要拎隻戒指出嚟求佢留低先make sense。

 

第十二代-打漁Leon

主題歌︰《長情》

金句︰我唔鍾意你去捉魚!

故事︰應該係有家底嘅Leon選擇做漁夫,被老豆用當年第二代廣告將疊紙掟向領導人嘅手法回敬。之後家人用視像電話通知老豆病重,立即飛返老家。

呢一代係繼楊采妮之後,再搵已為人認識嘅女藝人做阿May,仲要係港姐徐子珊,都幾估佢唔到。而呢個廣告之後,似乎Leon阿May系列都告一段落,呢一輯將過去嘅元素撈埋晒︰愛情、親情、靚景、突然要走人嘅劇情……

最近的19+幾樣野

少女誤信流言食棉花減肥 食咗成張被落肚

溫暖危機?醫生︰羽絨被或導致肺病

【慎入】煙民必睇 30年煙剷成個肺黑晒!

Ming仔再瀨嘢 捐單頭數撐抗爭 網民︰做帛金呀?

出唔到九龍返工?網友行俾你睇

中伏!賭城酒店房雪櫃 汽水郁過冇開都收$2700