使用條款 | 私隱政策

黑人旅客被當成毒販扣留半日 事主受盡屈辱︰好憎香港

 

旅遊業呢期叫苦連天,但係有旅客嚟嘅時候……我地又點對人地呢?

 

美國熱門討論區reddit就有位巴打,講出喺香港嘅經歷。

呢位事主有雙重國藉,同時擁有分別係非洲同歐洲國家嘅passport。

事發時候佢用非洲passport入境香港,再上內地簽約。

 

當佢排緊隊過入境處counter嘅時候,

有職員喺二三百人入面揀晒全部8個黑人入房查問。

事主形容查問過程非常具冒犯性,問佢地嚟做咩、住邊度、有幾多錢喺身,

甚至要展示身上財物,仲喝佢地「唔好喺度做嘢,到期好走!」。

 

事主接受完查問、過完關等行李,因為肚痛捽咗吓個肚,

跟住即刻就有關員粗暴地捉佢入房,等一輪再審問。

關員指指事主行李,再問 how many Kilo?

事主好單純咁以為係行李重量,就答43公斤,

點知關員聽完就嘩一聲,仲講咗好多廣東話。

之後再有人審問,仲set好晒攝錄機。

即使事主show晒ipad入面會見面嘅工作伙伴聯絡,

都有位職員大大聲兇佢

「我地唔會信你講嘢,你係毒販! 我地知你啲黑人架,個個想靠販毒發達。尼日利亞人我地拉唔少啦,我地知架!」

「你知唔知喺我地香港嘅監獄係唔駛錢就有飽飯食」。

嬲到事主掟張100蚊美金出嚟話「我嚟做生意,唔係走粉!」。

 

盤問冇發現,關員就搵緝毒犬同試紙搜行李,

無發現咩?就話事主將毒品藏喺體內。

 

硬功唔得,關員就出軟功,扮friend咁話

「如果你肯幫我地手我地可以俾嘢你做,話我地聽邊啲非洲人帶毒品嚟香港咁你就唔駛踎監」

 

過咗6個鐘,關員仍然唔俾事主打電話,亦唔俾去廁所,要事主威脅就地小解,

先至搵5個人押佢去。

其中3個錄影審訊過程嘅人仲想跟埋入廁所,事主唔肯就範。

結果由2個人跟入去,全程受監視。

 

去完廁所,關員氹事主簽一份中文文件,冇提供英文版,

亦無詳細解釋。

事主拒絕先至俾過份英文嘢叫佢簽,內容係同意進行全身搜證,

佢知自己清白,好樂意咁簽。

事主被人押送去醫院進行搜證,途中有關員同事主講,

今次因為你實有得升職。

去到醫院做CT scan,證實體內無毒品,成班關員黑晒面。

重點嚟啦,檢查完呢班關員派咗個人入嚟叫佢換衫,話車佢去酒店。

但係事主換完衫行出去……

成班人唔見晒!無道歉,當然無車坐。

喺超過10小時大龍鳳之後,事主凌晨4點就咁俾人丟低喺醫院。

 

佢未嚟過香港,未換港紙,本來有人接佢去酒店所以冇酒店地址。

夜媽媽自己截的士,搵間有房但係貴嘅酒店落腳。

 

事主第二日同公司聯絡,公司建議佢採取法律行動,仲話會提供協助。

但係佢趕住北上簽約,無辦法留喺香港搵律師做嘢。

最妙係之後返到機場,事主見到其中一個關員,個關員扮嘢話無見過事主!

 

唔知有關方面點回應呢?

不過,提提大家,呢個係網友一面之詞,

如果真係一如事主所言有拍片的話,咁應該有晒紀錄嘅,要查清楚唔難呀。

原post傳送門

最近的19+幾樣野

【自我隔離】父母救星!幾萬張填色畫 工作紙 完全免費

偽造病毒檢測報告 淘寶有得賣

有樣學樣 網紅舔廁所後疑似確診新冠肺炎

空貨架前來遲一步 伯伯背影睇見心酸

防脫髮變勁脫髮 絲打用錯洗頭水變火雲邪神

西洋明星戴口罩 邊個戴錯晒?