使用條款 | 私隱政策

【抗疫日常】睇日劇《俠飯》一次過煲劇兼學煮日式料理

 

出街食變得極麻煩,個個都「現時自己肯做飯」,

睇youtube片學煮兩味之外,

可以再懶啲,煲住劇學!

 

2016年日劇《俠飯》,改編自同名小說,

故事講頹爆大學final year男生良太喺屋企門口遇到黑幫槍戰。

黑道大佬柳刃龍一為救良太受傷,而警察已經殺到現場,

龍一同埋手下只好匿喺良太間屋避風頭,三個人就好似我地而家要限制社交距離咁,

冇咩事都唔可以外出。

因為咁,擅長烹飪嘅龍一喺有限資源之下,煮咗好多餐一啲都唔頹嘅飯。

套劇唔長,半個鐘一集,一共10集,

唔係《深夜食堂》咁,講人生先係主菜;

亦唔似《孤獨的美食家》,得個睇字冇得食。

《俠飯》輕輕鬆鬆加少少日式熱血,仲有烹飪示範,好multi-tasking!

 

睇完好想跟住煮就一定,最重要係劇中人處境似我地,要盡量留喺屋企,

唔係想食咩就可以仆落街買餸返嚟整。

所以有好多材料都係屋企順手拈來就有,

例如第一集就教人整升呢版罐頭沙甸魚。

方法係將罐魚打開,倒起部份油,然後切一片檸檬兼且擠少少檸檬汁,

再加少少日式豉油,之後就成罐魚放上煮食爐,慢火煮滾,滾起熄火上碟,加少少辣椒粉調味。

我試過,我真係試過,係work嘅!

 

另一個睇完學到嘢入袋嘅,係煮……飯!

係!越基本嘅越難學,但係越有用。

 

首先,好多人洗米都係用飯煲個內鍋洗,千祈唔好貪方便,咁會洗花個煲。

所以要搵個碗嚟洗米。

第二,好多人洗米都係用水喉水洗,又錯!

洗米會影響飯味,因為米會吸水,要用樽裝水洗。

仲有洗米都要講手勢……其實唔應該叫洗米,

因為呢個過程唔係要將米洗乾淨,而係要令米粒互相磨擦,打磨表面,

手勢係類似用手洗衫咁搓呀搓。

洗完,仲要浸一陣先煮,等啲米吸下水,先至夠鬆軟。

 

呢啲只係第一集其中2個煮飯貼士,呢集連酙啤酒學問都有教,

係咪堅有用先?

食完飯結尾再醒個人生小道理,龍一話雪櫃入面嘅剩餘物資都可以變得好味,

正如所有嘢都有佢嘅價值,鼓勵咗搵工失敗嘅良太。

 

胃口同心靈都飽晒,呢30分鐘值得俾佢啦。

最近的19+幾樣野

6位數月薪掛名返工 企業高層打官司求公司炒佢

唔記得買咗樓 業主28年後勁賺30倍 點知間屋有人住緊

【抗疫煮食】納豆都可以自己整

南韓足球聯賽搵吹氣Mary扮觀眾 球會致歉

佐敦著過落場 第一代Air Jordan波鞋434萬成交

疫情影響演唱會延期 歌手Bryan Adams 怒爆「多x謝食蝙蝠嘅xx」後改口風道歉

同一條經濟不景氣問題 內地大學生一年內立場由驕傲變悲觀

下一個400下咖啡? 歐美流行自家製pancake cereal